ነሓሰ 23/2017 ዓ/ም ዩኒቨርሲቲ ኣኽሱም ምስ ቤት ፅሕፈት ባህልን ቱሪዝምን ከተማ ኣኽሱም፣ ቢሮ ባህልን ቱሪዝምን ትግራይን ርእሰ ኣድባራት ወገዳማት ኣኽሱም ፅዮንን ብምትሕብባር “ዓይኒ ዋሪ፦ ሰረት ሰላም፣ ተስፋን ሓድነትን ትግራይ ” ብዝብል መሪሕ ሓሳብ ኣብ ኣዳራሽ ባህልን ቱሪዝምን ከተማ ኣኽሱም መፅናዕታዊ ዋዕላ ዓይኒ ዋሪ ተኻይዱ።

ኣብዚ ኣብ ከተማ ኣኽሱም በዓል ዓይኒ ዋሪ ኣመልኪቱ ኣብ ዝተዳለወ መድረኽ ዘተ መኽፈቲ ሃይማኖታውን ባህላውን ዋዕላ ከንቲባ ከተማ ኣኽሱም ኣቶ ትኩእ ሃይሉ ተረኺቦም ንተሳተፍቲ እንኳዕ ደሓን መፃኹም ምስ በሉ፤ ንሕና ኣኽሱማውያን ሰረት ናይ ኩሎም ታሪኻት ስለ ዝኾንና ታሪኽ ምፍላጥ ጥራሕ ዘይኮነስ ካብ ታሪኽና እውን ተጠቀምቲ ክንኸውን፣ በቢ ዓመቱ 24 ነሓሰ ዝኽበር በዓል ዓይነ ዋሪ ባህላዉን ሃይማኖታዉን ክብርታቱ ሓልዩ ንሓድነት ትግራይ ክዉዕል ከንሰርሕ ከምዝግባእን ገሊፆም።

ምስ እዚ ብተወሳኺ ምርምርን ስግግር ቴክኖሎጅን ምኽትል ፕረዚደንት ዶ/ር መኮነን ኣረጋይ ኣብቲ መድረኽ ተረኺቦም ንተሳተፍቲ እቲ ዋዕላ ናይ እንኳዕ ደሓን መፃኹም መልእኽቲ ኣመሓላሊፎም። ብተወሳኺ እውን ቀንዲ ዕላማ እዚ ዋዕላ ብሰንኪ ሱር ዝሰደደ ብድሆ ኣብ ልዕሊ ሓድግታትን ትውፊታትን ትግራይ ብፍሉይ ኣብ ልዕሊ ዓይኒ ዋሪን ኣሸንዳን ብናይ ታሪኽ ተሻመይቲ ዝበፅሕ ዘሎ ናይ ታሪኽ ምንጠላ ብምንፃርን ናይ ቀፃሊ ሕውየቶም ዝረጋገፀሉ መንገዱ ምሕባር እዩ ኢሎም።

ብፁእ ኣቡነ ሰላማ ሊቀ ጳጳስ ኣውስትራልያን ኒውዝላንድን፤ ኣብ መንበሪ ሰላማ ላዕላዋይ ሓላፊ ስብከት ወንጌልን ሓዋርያዊ ተልእኾን ኦርቶደክስ ተዋህዶ ቤተ ክረስትያን ትግራይ ኣብዚ ዋዕላ ተረኽቦም እንኳዕ ደሓን መፃኹም ምስ በሉ፤ በዓል ዓይኒ ዋሪን ኣሸንዳን መበገሲኦም ሃይማኖታዊ ኮይኖም፣ ኣፈፃፅምኦም ድማ ባህላዊ እዩ፤ ዝብል ቁልፊ መልእኽቲ ኣመሓላሊፎም።

ኣብዚ መፅናዕታዊ ዋዕላ፦ሃይማኖታዊ ኣመፃፅኣን ኣከባብራን በዓል ዓይኒ ዋሪን ኣሸንዳን፣ ክብሪታት ዓይኒ ዋሪ ትማልን ሎምን፤ ዓይኒ ዋሪ ሕላገት ከተማና፣ ግደ ሰብ ዋና ኣብ ምርግጋፅ ሕውየት ቱሪዝምን ዘለቔታዊ ቁጠባዊ ተጠቃሚነትን ዝብሉ ፅሑፋት ቀሪቦም። ኣብዞም ዝቐረቡ መፅናዕታዊ ፅሑፋት መሰረት ብምግባር ብተሳተፍቲ ንዝተላዕሉ ሕቶታትን ሪኢቶታትን ብመቕረብቲ እቲ መፅዕታዊ ፅሑፍ መልስን መብራህርህን ተዋሂብዎም።

ኣብ መወዳእታ ሓላፊ ቢሮ ባህልን ቱሪዝምን ትግራይ ዶ/ር ኣፅብሃ ገብረእግዝኣብሄር ንመዳለውቲ መፅናዕታዊ ፅሑፍን ተሳተፍቲ እቲ ዋዕላን ብምምስጋን በዓል ዓይኒ ዋሪን ኣሸንዳን ሃይማኖታዊ ትሕዝትኡ ከይቀየረ ክኽበር ከም ዘለዎ መልእኽቲ ብምሕላፍ እቲ ዋዕላ ተዛዚሙ።

ዩኒቨርሲቲ ኣኽሱም